كسَّار الزبادي

لقمان ديركي

وفتتكم بالحديث عن تلوين اللمات بواسطة أيادينا الصغيرة الناعمة الكريمة، والتي كانت تعود إلى البيت ملونة شي أحمر وشي أصفر وشي أزرق وياقي الجوقة اللونية القوس قزحية،ولم يكن مشهد سطوع الزينة في الحارة هو مصدر البهجة فقط، وإنما كانت المشاركة الجماعية في صناعتها هي المصدر الاساسي للسعادة والفرح، لم تكن الزينة جاهزة دائماً، ولم يكن هناك من يعلقها ويركبها مقابل أجر، لا ..لم تكن الأمور كذلك، كانت هناك معالجة للأغصان الحورية الصنوبرية السروية وباقي الفصيلة الحراجية تتعرض لإحراج كبير عندما كنا نقصها من شجرة صنوبر داشرة غير محمية بحارس شرس، وكنا نقلمها، ثم نتعربش على أكتاف بعضنا كي نعلقها، أما إذا أعطانا الكبار سلماً فهذا يعني أنو أمنا ـ ألله يسلِّم كل أم عن حقاً ـ  داعيتلنا، وكانت الأعلام التي كتب عليها اسم الرسول العظيم تحتاج إلى ضم إلى حبل طويل واحد، وكان الحبل يحتاج صعود مجموعتين إلى سطحين متقابلين، وفي الصعود إلى سطوح الجيران بشكل شرعي هذه المرة كنا في قمة الحبور، مع أنو الأستاذ وقت اللي سأل طلاب صفنا عن معنى كلمة الحبور ما حدا عرف شو بتعني، يمكن لأنها بتشبه الحبر، ونحنا ما كنا نطيق الحبر لأنو بيذكرنا بأكتر شي بنكرهه ألا وهو الدراسة، وكنا في التحدث مع أصحاب البيت الذي نحن على سطحه وكأننا أشخاص مهمون غاية في الفخر والإعتزاز بذواتنا، لأنو العادة لما بنلتقى بالجارة بالشارع ما بيكون اللقاء على هالدرجة من الإحترام، ألا ما كنا ناكل لنا شي بهدلة أو مسبة أو نصيحة أنو ننضب ببيوتنا ونفتح كتبنا لأنو مو معقولة كل الحارة يطلعوا (أعمال حرة) بس يكبروا، على الأقل يطلع لو شي…. أشو طبيب، أشو مهندس، أشو محامي، على قولة جارتنا الإدلبية مرة السنكاوي، وقّفت بالمهن الراقية عند هالتلاتة، ولهلأ كلنا واقفين معها عند هالتلاتة، حتى صارت بلدنا كلها دكاترة ومهندسين ومحامين، بس كلهم بعد الضهر بيشتغلوا شوفيرية تكسي، المهم وين كنا، أخدنا الحديث وسردنا، لا تؤاخذونا، بس كنت عم أحكي عن الفرح برمضان، عن البهجة، بس شو اللي ذكَّرني بالموضوع يا حزركم؟!!!.. ولا شي.. شغلة عادية… مجرد إعلان عالشريط الإخباري.. أنو تشعيل الزينة بالأعياد عمل مو حضاري.. مشان التقنين!!..هل سيأتي يوم نقرأ فيه إعلاناً للتخفيف من الضحك والتقنين فيه؟!!   مو مشان شي.. لا تفهمونا غلط، مشان خواصرنا ما تطق.
مسلسلات طبيعية
¶ النهر والمزبلة

هناك في شبعا وهي ضاحية من ضواحي الشام، بل وإنها صارت إلا شوي بقلب الشام، هناك فيها نهر، وعلى كتف النهر أو حرمه كما يقولون هناك مزبلة، ولأن الأهالي حبابين ونظيفين وبيتفرجوا على التلفزيون وبيسمعوا كلام شركة الكهربا وشركة المياه، وبيطبقوا كل القواعد اللي بكتاب القراءة وقانون السير، وبيعطفوا على الصغير، وبيحترموا الكبير، وبيقوموا بالباص للنسوان وللختارى، وفوق اللي منها بيحبوا المنظر الحلو، والريحة الطيبة، قام بناء على كل هذه المعطيات على قولة الزميل وجيه شويكي فقد نظفوا المكان، يا سلام، هناك ناس في سورية نظفوا بقعة اسمها مزبلة، بل وتابعوا المعجزة وزرعوها بالأشجار، وأصبحت المزبلة حديقة عامة على كتف النهر، وكتف النهر أو حرم النهر أملاك عامة، فأيهما أفضل !!..
نعم حدث في شبعا.. نعم حدثت هناك على كتف النهر أشياء غير طبيعية من تنظيف وترتيب وزرع وسقاية.. ورعاية… لكن الذي تلا ذلك كردة فعل من قبل البلدية كان طبيعياً جداً ولا يثير الاستغراب، فلقد اقتلعوا الأشجار.. ورجّعوا للمكان مكانه ومكانته،.
شروي غروي
¶ الخط الأحمر دوت كوم
* قال الطفل النجم لما كان بالمصح: يللي بيصير معه الايدز بيموت!!.. يا لطيف..
* بعد 18 حلقة من الخط الاحمر اكتشفوا أنو لازم يكون في بواااب !!..
* يللي بيضيع أي شي.. هوية ..جواز سفر.. أخته أخوه.. أبنه.. بيلاقيه بالمصح تبع الخط الاحمر العرض ساري حتى نفاذ الكمية..
أبو عصام         لن ننساك
22  يوماً على إقصائه
¶ مسابقة أبو عصام الثقافية الرمضانية
* كم مرة تم الترحم على أبو عصام في باب الحارة؟!..
* لماذا سمي العقيد أبي شهاب بـ(هشام ) ولمرة واحدة وحيدة لوالديها الأحياء على لسان حرمه المصون وهل لهذه التسمية علاقة بالرائد هشام ثم ماهو وجه الشبه بين الرائد هشام والعقيد أبو شهاب غير المرتبة ؟!
* ماهو نوع الأقفال المستخدمة في أبواب بيوت  باب الحارة وأين صنعت؟!..
* ماهو الرابط المشترك بين ليالي الصالحية والخوالي وتمر حنة وأهل الراية وماهو الرابط بين الحر ابن الحرة ونصار الخوالي وبين جوزة المعلم عمر وجوزة أبو الحسن وبين عودة شقيق المعلم عمر وعودة شقيق الفران؟!..
* ما اسم الجامعة التي تخرجت منها داية أهل الراية قبل أن تتوفى مأسوفاً على خبرتها الغضة في تأكيد العقم عند النساء مع العلم أنها  زميلة للجمعية الملكية للدايات في المسلسلات البيئية؟!..
* الحسن الله يسلمو ابن أبو حسن ماغيرو زعيم حارة أهل الراية كان يترغل متل البلبل ولكن بعيد أختطافة على يد الغجرية أصيب بنوع من أنواع الصمت الغريب وهي تقول لشيخ القبيلة أنه ابن أخيها في حمص والسؤال : حدد نوع الصمت الذي أصيب به حسون الصغير هل هو صمت المسلسلات أم صمت الفبركات أم صمت استغشام المشاهد؟!..
ترسل الإجابات على بريد أبو عصام لن ننساك
سامر كاسوحة
¶ فشكة مفشكلة
شي بيقولوا أنو عربي مات برصاص روماني بعدها بيقولوا مات برصاص ألماني ارسوا على بر بقى..
¶ تطور ملحوظ
راح نشوف بباب الحارة الجزء الرابع شوية تطورات، معتز بيكمل دراسة وبيعمل ماجستير  ومن ثم دكتوراه بالطب وبيشتغل بمستشفى المجتهد، وأبو غالب ببيع بدال البليلا بطاقات شحن للموبايل وبيصير بنادي : بطاقة اشتروكي وبالليل شحنوكي وع السهرة خلصوكي، وأبو حاتم بيفتح بدال القهوة كافي نت وبيفتح جناح بلياردو تحت، وأبو شهاب بيتطور وبيصير بيهرِّب أسلحة للثوار من (كوريا(، وبالمرة بما أنو لطفية وهدى آكلين عصام بلا ملح بنصير نشوف عصام بالجزء الرابع عم يمسح ويكنس بالبيت..
سمير حسن حسن
¶ سوبر شهاب
 أبو  شهاب سوبر مان ماشاء الله ماحدا بيقدر يعلم عليه، حتى لما أسروه الانكليز ماعلَّموا عليه، لوكان في 4 متل ابو شهاب كنا لعبنا طرنيب ولكان الوطن العربي بألف خير.
عبد الهادي
¶ رب ضارة خير من ألف ميعاد
يعني كل الفضل إلك يا أم حاتم لأنكِ وقعتِ من على الدرج..بهالحالة بالصدفة خليتِ الحكيم يجي ع بيتكم ليطببِكْ، و بالصدفة بتشوفه حميدة و قلبها بيدق، وبالصدفة ابو حاتم بيعرض عليه يشتري عياده عندهم بالحارة، و بالصدفة بيصير بده حميدة تشتغل معه.. وبكرة بتشوفوا بالصدفة بيطلبها للزواج .. يعني نقشت معك يا حميدة.. دكتور و أضرب و أطرح.. فرب ضارة خير من ألف ميعاد..
مروة شيخ الأرض
¶ حتى الموسيقا
كل شي تغير بغياب أبو عصام حتى الموسيقا التصويرية فهي في واد وأحداث المسلسل في وادٍ آخر وتشعر أنها موسيقا لكنها ليست تصويرية.
الإسكافي
¶ على أبو جنب
آخر دسة دسوها ولاد الحلال ووصلوا خبر لمعتز ابنه لأبو عصام وقالوا له أنو أبوه يللي منشانه روَّح خيرية من إيده وضل حزنان عليه رغم أنه حبه العذري دبحه دبح…. قد فعلها…. نعم أبو عصام بدَّلك يا معتز وتخلى عنك وتبرى منك وراح تبنى جعفر.. وصار أبو جعفر المنصور، إيه انت صرت ولا شي يا معتز، بدل أخوك الكبير قلنا ماشي، طيب يحط اسم معتز على الأقل ….. كان الخبر متل الرصاص على معتز وين بدُّه يودي وشه من عضوات الحارة… منشان هيك فكر عصام وقرر أنه ماله غير مساعدة أبو معروف، إيه نعم فراس ابراهيم كونه المنتج لمسلسل ليل ورجال وكان سخي كتير بالبخورات، فلمع نتيجة لذلك نجم الشيخ أبو معروف  فذهب معتز لعند شيخنا وقال له إيدي بزنارك يا شيخنا راحت خيرية منشان ولا شي.. أبي بدلني برخيص.. وبدي منك سحر أسود… أحمر… ما بيفرق اللون بس منشان الله خلي هالعريس يقلب عن خيرية قبل الليلة المشؤومة شيت الدخلة؟!..
يبتسم فراس ابراهيم ابتسامته المعهودة في جميع المسلسلات وبيقول بقلبه مع فلاش باك متل زهرة النرجس: (والله ومشي شغلك يا أبو معروف وقدرت تموِّت أبوعصام  لحتى تركِّع أهل حارة الضبع عند رجليك), يعطي الشيخ أبو معروف حجاب ما بعده حجاب لمعتز وهو على أتم الثقة أن تأثيره هذه المرة على الجزء الثالث سيكون أعمق من الجزء الثاني خاصة إنه هالسنة أنتج فراس ابراهيم مسلسين مو واحد وماحدا قدُّه ؟؟..  وفعلاً يفعل السحر الملون مفعوله وبيخلي عريس خيرية يقلب عنها وهون بتجي فرصته لمعتز ليضرب عصفورين بحجر، بيرجِّع حبه العذري أولاً، وبينتقم من اللي تخلى عنه ليصير أبو جعفر ثانياً … وخاين يا طرخوم ..
وتشاهدون في الحلقات الأخيرة عرس معتز على خيرية يباركهما الشيخ المبروك أبو معروف
بضحكته المعهودة طبعاً، وبنصرٍ يأمل فراس إبراهيم أن يمتد إلى أبواب الحارات جميعاً..
فتوش
لمناصرة قضية أبو عصام العادلة الرجاء إرسال أية معلومة تحصل عليها مهما كانت تافهة فربما تفيدنا في التحقيق عسى ولعل نراه يعود من الشهادة إلى النصر في المشهد الأول من الجزء الرابع، وإنا على دربك لسائرون lukmanderky@baladnaonline.com هذا البريد محمى من المتطفلين , تحتاج إلى تشغيل الجافا سكريبت لمشاهدته
الرجاء كتابة جملة (أبو عصام لن ننساك) على موضوع الرسالة، وبحياة الله تدعمونا بالاقتراحات والتفتيقات. لن ننساك
حردت زوجة عصام بنت أم بشير لأنو اتخانقت مع فريال  علنا وبنص الحارة خطيب خيرية اكل قتلة على إيد معتز القبضاي
———