كاوا درويش
المكان: “مكتب التشغيل في وزارة الشؤون الاجتماعية”
– الموظفة: اسمك وشهادتك؟ ومؤهلاتك؟؟
– هوزان محمد، إدارة أعمال من جامعة حلب، واقتصاد من جامعة روجافا، إلمام بكافة برامج المحاسبة والعمل على جميع برامج الكمبيوتر..” ايكسل، وورد، برامج المستودعات…” الخ… وأتقن المحادثة باللغات الانكليزية والعربية والكردية، وشيئاً من الفرنسية والتركية…
– الموظفة: كم سنة خبرة عندك ؟
– هوزان: 3 سنوات بطالة مقنَّعة، و5 سنوات كمتطوع في انتظار الرحمة من السماء…
– الموظفة: شو عندك مؤهلات إضافية كمان؟
– هوزان: مؤهلاتي الإضافية وخبراتي كتييييرة وما بتخلص…حارس مولدة أمبيرات، عامل ديليڤري، معاون باص نقل داخلي، أدمن صفحات وهمية.. وكتير شغلات تانية…
– الموظفة: أ. هوزان.. طيب شو، الشروط الي حابب تكون متوفرة بالوظيفة الي ناوي تتعين فيها؟؟
– هوزان: 1- أن تكون وظيفة ثابتة.
2- أن تكون في القطاع العام.
3- ما تكون مشبوهة ومافيها مسؤولية كبيرة بحيث ما توجعلي راسي…
– الموظفة: بصراحة في عندنا شاغر لوظيفة على كيف كيفك، بس يشترط في المتقدم أن يملك عشر سنوات خبرة، وفي نفس الوقت لازم يكون خريج هاي السنة…
– هوزان: عفواً ؟؟؟ كيف هييييك؟
– الموظفة: ولوو فهمك كفاية هوزان…يعني بيكون من أيام الروضة عم يشتغل، وبيفهم بكل شي، بس من تم ساكت، وما بيتدخل بشي…
– هوزان: أهاااا… يعني في أمل ؟؟
– الموظفة”مع غمزة”: طبعاً، دائماً في أمل ولكن بطريقة وحيدة، وهي انك تزبط أمورك مع موظف الch.r
– هوزان: وإذا ما قدرت أزبط حالي مع ال ch.r؟
– الموظفة: نقدر نحطك على قائمة الانتظار الذهبية بوظيفة أخرى محترمة…
– هوزان: وشو رح تكون وظيفتي المحترمة ضمن قائمة الانتظار الذهبية؟
– الموظفة: رح نعينك كنموذج تجريبي للعاطلين عن العمل، نعمل عليك أبحاث توضح ردود أفعال المتقدمين للوظائف والمنتظرين من سنين ضمن قائمة الانتظار الذهبية، والي وعدناهم بوظائف من زمان ولسا ما وظفناهم…
– هوزان: يعني بالمشرمحي قولي رح أكون فأر تجارب عندكم وخلص؟
– الموظفة: لا محشوم أستاذ، بس كمان في لسا كم شرط سهل وروتيني لازم تقرأهم بنفسك، وإذا وافقت عليهم خبرني مشان أجهزلك عقد توظيفك وتوقع عليه…
– هوزان عم يتمتم وهو يقرأ الشروط السهلة- الروتينية ” راتب لا يوجد، مكتب لايوجد، ولكن هذه الوظيفة ستمنحك خبرة تُضاف للcv خاصتك، وبالتالي ستمنحك أفضلية مطلقة في أي مسابقة تتقدم إليها في المستقبل…
– هوزان: طيب، موافق، موافق، موافق…
– الموظفة: إذا هيك، تفضل حط توقيعك تحت…
– هوزان: يارب يسِّر…وهذا توقيعي أدناه: ” فأر تجارب”
