وفاء عبد الرزاق
مهمومْ چَبدي امْنِّ الچَبِدْ
يِهدي البَرِدْ شَدَّة بَرِدْ
والساكن بعَيني سِعِدْ
طعنْ ابطعِنْ يَوَليها.
البلگلُبْ ضَدْ الگلُبْ
يگابلني چَنْ مخلَبْ غُرِبْ
عطَّشْ اعروگي امْنْ الَّلهِبْ
اوچنتْ اعتقد راويها.
خُبْزَةْ صّبرْ مِن گحُّفَتْ
لِهمَتْ گحطها اتچتِّفَتْ
بهمَّة عزمْها تلاصفَتْ
محَّدْ سألها اشبيها.
شگدْ عذَّبِتْ خلگْ الصبرْ
أنهض واواكحْ بالعَثِرْ
محسودة جَيَ وَجهي نضِرْ
محَّد درى بخافيها.
العكَّاز أخذته امنّْ الصغِرْ
وأعشِّم الليل بفَجِرْ
هلبَت يهلّْ هلبَتْ يِطرْ
وكلما طحِتْ يحنيها.
وسفة وانا بتالي العُمرْ
مِنْ تِنضح جروحي حمُرْ
انسَتري فَرَح ،ما تنسِتِرْ
ورگة أسَفْ تطويها.
شفتوا بحَرْ شوكْ السِفنْ
خيطَتْ شِرعها امن الجفِنْ
هسَّه يحِنْ لا ما يِحِنْ
او رَعْدْ السِمه ساريها.
مشروخة ثاري رِحلِتي
ثوَب البَسِتْ من عَتمتي
بستان صرتْ الغيرتي
أگطف ورِدْ زاهيها
عيون الرجه ضاگتْ رجه
تنطِرْ وِسِعْ باريها.
التعليقات (0)